رباب ممتاز عن داليا شوقي في “سفاح الجيزة”: “الدور مش لايق عليها”

06:57 م


السبت 09 سبتمبر 2023

كتب- مروان الطيب:انتقدت الفنانة رباب ممتاز مسلسل “سفاح الجيزة” وبالأخص أداء الفنانة داليا شوقي بعد عرض الحلقتين الخامسة والسادسة أمس الجمعة، مؤكدة أنها لم تكن موفقة في انفعالاتها، على حد قولها.

وفي تصريحات خاصة لـ “مصراوي” تحدثت “رباب” عن مسلسل “سفاح الجيزة” وعن المخرج هادي الباجوري إلى جانب عدد من أبطال المسلسل وعن رأيها بالمسلسل بشكل عام.

وعن رأيها في أداء الفنانة الشابة داليا شوقي بأحداث المسلسل قالت: “داليا شوقي انا شفت لها مسلسل فوبيا مع فتحي عبدالوهاب و دورها كان حلو أوي، أنا نفسي سألت عليها وهي ممثلة كويسة جدًا لكن المشهد اللي اتعمل ومسلسل سفاح الجيزة بشكل عام ممكن مايكونش لايق عليها”.

واستكملت: “أنا نفسي عملت أولاد عابد بطولة واحدة ناعمة هادية منفعش معايا، بالرغم إنه من الجلدة للجلدة بطلة رئيسية أنا وانتصار ورياض الخولي، كل الناس ماشفتيش إن أنا الناعمة الهادية اللي هي الغلبانة المغلوبة على أمرها، هو ربنا ادى كل ممثل مننا شكله وموهبته وأدائه ممكن يكون الحظ لم يسعفها في الدور وكان أوفر شوية لأ كان أوفر كتير، وأنا اشتغلت من وأنا صغيرة وعملت مسرح وعملت أدوار مهمة مشوفتش الريأكشن ده في حياتي وفيه ردود أفعال بشكل مبالغ، أنا مشوفتهاش حتى على زمايلي لما بيجيلهم صدمة معرفة شيء، ولا أنا درسته”.

وتابعت: “أنت لما بيجيلك صدمة في حياتك بيحصل حاجة من الاتنين يا إما بتفضل صامت وتجيلك الصدمة والسكوت وعدم الرد خالص، والحالة التانية الانهيار اللي بجد الحقيقي اللي أنا أصدقه”، وعبرت عن ضيقها من قيامها لأول مرة في حياتها بانتقاد زميل أو شغل “دايمًا بسكت وبشتغل وفي حالي”.

وأردفت: “الأستاذ هادي وكل اللي شغالين في المسلسل جامدين في المطلق لكن هنا مفيش حوار والحوار متكرر ولما تفرد لي حياة السفاح وأنا مش عاوزة أتعاطف مع السفاح والقتل مالوش مبرر لكن على الأقل بدل ما تجيب لي بيت باسم سمرة وابنه أنا مالي بباسم سمرة وأزمته، وكان المفروض يفرض مساحة أكبر لخلفية شخصية السفاح، وقلت ركين سعد وريم حجاب من الناس الجامدة والأستاذة حنان يوسف كان أدائها سلس جدًا، بس أنا من كتر استفزازي اني اتفرج على المسلسل وفي الاخر مش فاهمة حاجة، هو الموضوع اخد ضجة ليه عشان قصة حقيقية مش أكتر ولا أقل لكن المسلسل مجاش”.

وعن المخرج هادي الباجوري قالت: “كان المفروض أستاذ هادي يتدخل في ريأكشنات داليا شوقي، هي لسه برضه بنوتة جميلة بدليل اني شفت لها حاجات عجبتني قبل كده لكن ملقتش ده المرة دي في مسلسل سفاح الجيزة”.

يذكر أن الفنانة رباب ممتاز تواصل تصوير فيلمها “أنا وابن خالتي” مع النجمين بيومي فؤاد وسيد رجب والمقرر عرضه خلال الفترة المقبلة. “سفاح الجيزة” إخراج هادي الباجوري، بطولة أحمد فهمي، باسم سمرة، ركين سعد، داليا شوقي، حنان يوسف.