12:22 م
الثلاثاء 24 أكتوبر 2023
كتبت- بهيرة فودة:
نشرت أسما شريف منير مقطع فيديو، عبر حسابها الرسمي بموقع”إنستجرام”.
وقالت أسما في الفيديو :” حسيت إني محتاجة أشارككم الإحساس اللي عندي، أكيد اللي بيحصل دا ليكم وليه سبب، وحاسة إن الإسلام بدأ يظهر بشكل جميل، وأوضح قد إيه المسلمين طيبين، وقد إيه الناس بتخاف على بعض، رغم إن الموضوع بقاله سنين بس إحنا كنا عايشين مش حاسين بالقصة”.
وأضافت:” بشوف على أكونتات كتير ناس بتحاول تقول كلام مفيد، وتعلي من صوتنا، ولو اللي بيحصل مش هايعلمنا كلنا حاجات كتير، مبدأيًا لازم الواحد ميبقاش مُدعي، يعني مينفعش حد يطالب بتحرير فلسطين، ويكن بيشتم أو بيقول كلام مش حلو، ولازم اللي مبيصليش يرجع يصلي لأن الانتقام صعب، ولازم كل واحد يحمد ربنا على بلده ويحس بالانتماء”.
وتابعت:” بستغرب الناس اللي قادرين يدعوا ويكذبوا، دا درس لينا كلنا عشان نحب بلدنا ونساعد إخواتنا بكل الطُرق، ولازم نبطل نعمل كذب على السوشيال ميديا، واللي بيحصل دا بيخوفني من الناس لأني بقيت بشوفهم مش حقيقيين، والفكرة كل واحد شايف نفسه قصاد نفسه إزاي، وأنا الناس بتشتمني دلوقت على اللايف، بس حقيقي مش عارفة اللي بيشتم دا بيستفاد إيه وأنا ولا هافكر في الناس دي”.
وأكملت:” بغض النظر أنا عايزة أقول إننا لازم نتعلم الدرس ونفكر نعدل في نفسنا، لأن العمر لحظة، واللي مزعل حد لازم يقف مع نفسه، وبالمناسبة اللي بيزعلني من الناس اللي بتشتم هتلاقوهم أكتر ناس مُدعيين وكاتبين حاجات كتير أوي بيطالبوا فيها بتحرر فلسطين، والناس مبقاش عندها دم، وفيه كمية نفاق رهيبة، وكذب رهيب، والفكرة لو أنت مسلم أو مسيحي، مستحيل يكون الادعاء هو اللي بنصدره للناس، وأنا مش شيخة بس نفسي اتعامل مع ناس طيبين”.
وأردفت: “ولازم نتعلم منبقاش همج، ونعمل اللي دينا بيقول عليه، وبتكلم على فكرة إن اللي إحنا فيه لازم يوقفنا ويعلمنا حاجة، وحقيقي مينفعش اللي بيحصل دا، ولو حد طلعني من الديانة يبقا يتكلم معايا بهدوء عشان أحب الدين أكتر والتزم أكتر، وأنا بطلت أزعل على فكرة إن حد بيشتمني، وأن اللي بيزعلني إن فيه ناس بيصدقوا نقسهم لدرجة الجنان، وعمومًا أنا كنت مهتمة أقول إن لازم الواحد يفكر إن اللي بيحصل دا درس كبير للعالم كله”.
واستكملت:” ولازم نحب نفسنا ونحب بلدنا ونتعلم نتمسك بيها لحد أخر رملة فيها، زي اللي بيحصل في فلسطين كلهم متمسكين ببلدهم، لازم ننتمي ليها ومنخربهاش، عشان على الأقل ناخد دروس مُستفادة من اللي بيحصل في فلسطين، والناس مش ماشية على الصِراط، ومن وقت ما الموقف دا حصل وأنا خدتها عِند مع نفسي عشان التزم في الصلاة، وبقالي 15 يوم مُلتزمة، ونفسي أفضل منتظمة باقي حياتي لحد ما أموت”.