03:05 م
الجمعة 22 مارس 2024
كتب – هاني صابر:
روى الفنان تامر حسني، موقفا جمعه بوالدته احتفالا بعيد الأم، موجها رسالة لجمهوره بهذه المناسبة.
وكتب تامر، عبر حسابه على “إكس”: “جمعة مباركة يا أغلى الناس.. النهاردة بكتبلكم بوست عن الأم ونفسي من جوه قلبي تقروه من أخ لأخواته وناتج من تجربة حقيقية بيني وبين أمي هحاول أختصره لأن الكلام عن الأم يحتاج كُتب كتير”.
وتابع: “هبدأ كلامي بإن أكتر موقفين في عمري زعلت فيهم هما اللي كنت معاندها في الرأي وكل الناس كانت في كفة وهي لوحدها في كفة، أقسم بالله الأم بتشوف وبتحس اللي أنت متعرفش تحسه، أوعى تقول أنا خلاص كبرت ومش هاخد رأيها والله والله بيبقى عندك دليل وحد بيطمنك أو بينبهك من مستقبل الموقف وأنت مش عايز تسمع وفاكر أن هي مش مواكبة الدنيا فهيكون رأيها راجعي تفتكر ربنا هيخلق قلب أم له فترة صلاحية يعني بيحس لفترة محدودة!؟ أكيد لا، مركز احساسها ممدود لآخر العمر في حاجة جواها بتقولها يا آه يا لأ. صدقوها”.
واستكمل: “أفتكر مرة زمان أمي فضلت تقولي على واحد صاحبي أنه مش كويس وغدار وحقود أنا فضلت أقولها حرام عليكي ده أحسن واحد في صحابي وأدافع عنه باستماته لحد ما الأيام دارت وفعلاً خرج منه الجرح الكبير والحقد الكبير اللي ميطلعش من إنسان بيكرهني أصلاً وعرفت ساعتها أن فيه ناس حوالينا لابسين قناع الحب لحد ما المصلحة هتروح وبعدين يبان وشهم الحقيقي، فعلمت نفسي متعشمش أوي في الناس عشان لما يغدروا متعبش أوي والناس الطيبين بجد أكيد هيبانوا ويبهرونا بحبهم وثباتهم الطويل اللي مش مشروط ولا قائم على مصلحة يعني برضو مش هنظلم حد كويس بس هنلغي فكرة التسرع في العشم الزائد”.
وأوضح تامر حسني : “هاجي بقى لنقطة نفسية غريبة أنا كل ما تكون إيد أمي على راسي والله والله والله بحس لو تعبان اني مرتاح، لو مهموم اني مبسوط، وكأنها بتشفط وبتسحب أي طاقة سلبية مش كويسة وتحطلي طاقة جميلة كلها خير وراحة .. الأيام اللي غصب عني مش بعرف أشوفها فيها بكون متوتر قلقان ولما بشوفها بقول في سري أنا بحمد ربنا عشان اتولدت لقيت الست دي أمي”.
وأضاف: “يلا نوريهم قد إيه بنحبهم واللي مزعل أهله يروح فورا يصالحهم يلا عندك سبب جميل أهوه جه من عند ربنا متخافش روح صالح ربنا هيكون معاك وهيخليك مجبور الخاطر صدقني.. وأكيد أتمنى لو يفضل ده شكل علاقتنا بيهم طول الحياة مش بس في عيد الأم، كل سنة وانتي طيبة يا أمي”.
جمعه مباركه يا اغلى الناس 🤲❤️…النهارده بكتبلكم بوست عن الأم و نفسي من جوه قلبي تقروه من اخ لأخواته و ناتج من تجربه حقيقيه بيني و بين أمي هحاول اختصره لأن الكلام عن الام يحتاج كُتب كتير ….
— Tar Hosny (@tarhosny) March 22, 2024
اقرأ أيضا:
بسمة بوسيل تكشف عن رسالة لابنتها تاليا بـ”خط اليد” بمناسبة “عيد الأم”
هكذا احتفلت مي نور الشريف بـ”عيد الأم”