03:25 م
الخميس 25 مايو 2023
تحدث الفنان طارق النهري، عن كواليس مشاركته في مسلسل “جعفر العمدة”، كاشفا عن مفاجأة بشأن المخرج محمد سامي.
وقال النهري، ببرنامج “ليالينا” المذاع على قناة “الفضائية المصرية” تقديم الإعلامي محمد السماحي: “بدأت الحكاية بترشيح من الشركة لأستاذ محمد سامي وقالوا طارق النهري عايزينه فرفض وقالهم لأ مش عايز قلق، قالوا لأ ليه شوفوه طيب قالهم خلاص يبعتلي صور حديثة له فبعتله صور.. خدتها برضه بروح طيبة.. من حقه ده المخرج فبعتله الصور فقالهم خلوه يجي يقابلني فروحت وكان بيحضر في مشهد وقالي أهلا .. كان قافش أوي فبصيت لـ صلاح حسن مدير الإنتاج فقالي معلش معلش”.
وتابع النهري: “خلص البروفة بتاعته وقعدت عيني عليه بشوف بيعمل إيه ودخلنا قعدنا فقالي إحكيلي بقى عن طارق النهري فقعدت أحكي باستفاضة بقى تاريخ لحد ما عديت المحنة وجتله فلقيته قام حضني وباسني وقالي إنت صاحبي لآخر العمر.. انت فيك كل حاجة أنا عايزها وقالي الورق أهو اقرأ وقولي”.
واستكمل: “حسيت وأنا بقرأ بملامح النجاح لأن محمد شاطر أوي هو مهاب في انهم يروحوا لراجل الشارع والبيت المصري أوي، فلقيت دي الصورة الحلوة والكلام اللي بيعبر فعلا عن الشارع ولقيت الشخصيات حية بتتحرك”.
وأوضح: “محمد سامي شاطر أوي انه يوجه ممثل وشاطر أوي في إنك إزاي تمثل لكنه هو فاشل أوي، إزاي يبقى ممثل تناقض غريب جدا في داخله إنما مخرج عبقري، فاهم ، واعي ، عارف كل صغيرة بيحب التفاصيل الصغننة أوي اللي عارف إزاي تنجح الشخصية.. بيديك الجملة بحجمها ومقاسها وإزاي تقولها لأن هو اللي فاهم هيركبها على إيه وإزاي فأرتحت جدا في العمل معاه” .
وأضاف النهري: “محمد سامي كان قاري ان أنا مخرج.. فكان يبصلي يقولي أنا عارف إنك إنت فاهمني خلاص فدي كمان إدتني ثقة تانية في نفسي فالحمد لله رب العالمين ان أنا وصلت للمرحلة دي”.
قدم طارق النهري في مسلسل”جعفرالعمدة” شخصية حمادة فتح الله.
مسلسل “جعفر العمدة” محمد رمضان، هالة صدقي، مي كساب، زينة، أحمد داش، إيمان العاصي، أحمد فهيم، ومن تأليف وإخراج محمد سامي.