08:33 م
الجمعة 14 يوليو 2023
كتب- مروان الطيب:
ونشر محمد رحيم مقطع فيديو للمداخلة الهاتفية لرامي صبري في حضور عمرو مصطفى عبر حسابه الرسمي على “انستجرام”، أوضح خلالها سوء الفهم قائلاً “في أغنية ليا قبل كده في 2013 لقيت الملحن محمد رحيم قال أن الأغنية دي شبه أغنية من أغانيه وطلعت هاجمت رحيم لأن هو ضايقني فكرة أنك بتهاجم نجاح وعلى الرغم من حبي ليه كملحن لكني اختلفت معاه كصديق واختلفت معاه عشان خاطر عمرو مصطفي”.
ليقوم بعدها محمد رحيم بإضافة عدد من أغانيه بالفيديو إلى جانب الأغاني التي قام مغنيها بسرقتها منها أغنية “أنا بحب عيونك” 2002 للنجم عمرو دياب وسرقتها من قبل رامي صبري بأغنية “مش أنا” عام 2005، أغنية “مشاعر” عام 2013 للفنانة شيرين عبد الوهاب وسرقتها من قبل رامي صبري بأغنية “وعد مني” عام 2015، إلى جانب أغنية “كل ده” عام 2004 للفنانة شيرين وجدي و”لا كده عاجبين” والتي اتهم الفنان عمرو مصطفى بسرقتها بأغنيه “بشرة خير” عام 2013.
وأوضح الملحن محمد رحيم موقفه من رامي صبري وعمرو مصطفى تفصيلاً قائلاً :”أولا يعلم الله سبحانه وتعالى اني معنديش أدنى وقت أضيعه في اني ادخل في أي مواضيع نظرا لانشغالي بمجموعة أعمال مهمه جدا ان شاء الله الناس هتشوفها قريب ولكن تعليقا على مشكلتك انت وعمرو مصطفى اللي الحمد لله اتحلت في مداخلة اذاعية وربنا ميجبش زعل أبدا بين الأخوات ولكن للأسف اللى حصل ان اسمي تم اقحامه من طرفك بشكل لايليق ونظرا لأن المداخلة كانت على إذاعة مشهورة فطبعا اتسمعت من بعض أفراد عائلتي ومنهم بنتي وأكيد قطاع كبير من جمهوري اللي بيحبني وبيحترمني وبيحب اعمالي فوجب اني ارد عليك بكل حب واحترام علشان أوضح واصحح المغالطات اللي حصلت في المداخلة انت قلت في المداخلة بالنص انك سنه 2013 هاجمتني بنفسك علشان أنا كنت (بحارب نجاح ) كان أخويا الفنان عمرو مصطفى حققه وقت ما قدم أغنية بشرة خير وكأن انا راجل معنديش حاجه أعملها غير إني أهاجم وأحارب الناس الناجحين وانت اللي وقفت في وشي !! وده طبعا كلام مغلوط ومسيء ولازم أصححه وأبين للناس الحقيقه اللي سكتت عنها سنين احتراما للعشرة الطويلة والصداقة اللي بتجمعنا كلنا اولا انا الحمد لله مش ناقص نجاح وتاريخ بفضل الله سبحانه وتعالى علشان أهاجم أي حد ناجح ربنا يعلم اني بدعي في صلاتي بالرزق والتوفيق لكل الناس وبتمنى الخير للجميع اللي حصل ساعتها اني علقت أن لحن بشرة خير شبيه إلى حد التطابق لعملين من أعمالى”.
واستكمل ” وهم أغنية لا كده عاجبين للمطربة الصاعدة إيمان سمير وأغنيه كل ده يطلع منك للنجمة شيرين وجدي والأغنيتين صدروا سنة، (2004) يعني قبل صدور لحن بشرة خير ب 9 سنين على الأقل ونظرا لنجاح بشرة خير وفرحتنا كلنا بيها انا قفلت الموضوع تماما ومرضيتش أبين للناس انا بقول كده ليه!!! ولكن الفيديو اللي تحت ده هو الفيصل اللي هيبين للناس إذا كنت بخترع كلام من دماغي ولا كلامي فعلا صح بناء على علم ودراسة وخبرة وانت طبعا راجل فاهم ودارس مزيكا برضه زينا، كما تم إرفاق لحنين آخرين من اعمالى وهما انا بحب عيونك للفنان عمرو دياب ومشاعر للفنانة شيرين عبد الوهاب واللي حصل إني لقيت نفس اللحنين دول تم استعمالهم في اغاني خاصه بيك وحققوا نجاح كبير معاك من غير ما تضع اسمي عليهم على الأقل جنب اسمك وطبعا الفيديو هيوضح المسأله دي جدا حتى لغير المتخصصين وواثق ان الجمهور هيتفاجئ وفي ناس كتير هتستغرب أنا ازاي سكتت طول السنين دي والإجابه لأني إنسان مسالم ومحترم وعمري ما اسمح لنفسي أرفع قضيه على زميل وأخ ومؤمن بتوارد الخواطر وحسن النيه دائما وطبعا دي مش مني دعوه للتخلي عن الحقوق ولكن العشرة الطيبة والمحبة والصداقة ليها علينا حق والخلاصة”.
وأضاف: “انك هاجمتني قبل كده أكتر من مره ومازلت لأني قلت كلمتين (فضفضه) هما من صميم حقي وقوانين الملكيه الفكرية واضحة ومفيهاش هزار في بلدنا وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف انت اللي زعلان وبتتهمني اني كنت بهاجم النجاح لأ انا قطعا مش بهاجم النجاح لأنني والحمد لله صديق النجاح انا فقط كنت بعلق على استحياء وخجل على ظاهرة سلبية جدا ومتكرره في أسلوب العمل في الوسط الفني وهي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين وانا عايز بعد تجربتك الأخيرة مع عمرو اللي سببت المشكلة دي كلها الناس تحاول تتخيل انا ساكت على ايه بقالي سنين ولكن بعد الاعتداء على أعمالي وأفكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب”.
وانهى تعليقه قائلاً: ” لأ طبعا ده كلام مرفوض تماما وفعلا انا مش هسمح لأي حد يقوله وربنا يسامح الجميع وطبعا أنا برد على الملأ لأنه كلامك كان على الملأ فلذا وجب التصحيح والتوضيح مع تأكيدي إن عمرو مصطفى طبعا أنا بعشقه وبحبه من قلبي وانت كمان أخويا وبحبك والدليل إني أول مرة اتكلم على مواضيع زي دي حدثت منذ سنوات ولكن زي مانت عندك أسرة وعندك جمهور تخاف على شكلك قدامهم أنا كمان زيك بالظبط مع تمنياتي بالتوفيق والنجاح الكبير للجميع أخوك الموسيقار المصري العالمي المجتهد والمحترم والمحب محمد رحيم”.