05:08 م
الجمعة 30 يونيو 2023
كتب- مصراوي:
كشف السيناريست الدكتور مدحت العدل تفاصيل وكواليس تتعلق بمسلسل “الداعية” بطولة الفنان هاني سلامة الذي تم تصويره أثناء فترة حكم الإخوان.
وقال خلال حواره مع برنامج الشاهد على قناة إكسترا نيوز: “احنا محضرين مسلسل الداعية من بدري.. كنا في الصيف وقعدنا نفكر أنا وأستاذ جمال وماندو العدل وقلتلهم يا جماعة عندي فكرة كده بتدور في دماغي عن واحد داعية بيحرم المزيكا ولما يجي يحب يحب واحدة بتاعت مزيكا، وابتدينا نشتغل عالفكرة وكانت انتشرت القنوات الدينية انتشار النار في الهشيم، وابتدينا نتفرج على شخصيات ما أنزل الله بها من سلطان وكل ما تقلب تلاقيهم، فده دورنا بقى تعالوا أفرجكوا الداعية اللي بتتفرجوا عليه ده تعالوا أفرجكوا عليه عايش إزاي وبيركب إيه وبيتأثر إزاي”.
وأوضح أن جميع مشاهد المظاهرات كانت حقيقية من أرض الواقع قائلا: “وإحنا كنا بنصور وقت حكم الإخوان ونزلنا المظاهرات كلها اللي جوه المسلسل متصورة من الطبيعة”.
وكشف عن محاولات إيقاف تصوير المسلسل، وقال: “ولما أعلنا عن المسلسل كان فيه رد فعل غير طبيعي وتمت المحاولة للوصول للرقابة على المصنفات الفنية ثم شكوى في أمن الدولة وحاجات كتير جدا عشان المسلسل يقف، والحقيقة أجهزة الدولة كلها كانت واقفة معانا بس جالنا إن فيه بلاغات ضد المسلسل لأن احنا في الإعلان التمهيدي كنا بنقول (يسقط يسقط حكم المرشد) فالإعلان كان مرعب في توقيت مرعب”.
وأضاف عن إصرار المنتج جمال العدل على تصوير المسلسل حتى إن قام بعرضه على موقع “يوتيوب”، وقال: “بداية من غنوة التتر اللي بتقول انتباه لو كنتوا بتحبوا الحياة، التتر عظيم مغنياه آمال ماهر وملحنه عمر خيرت، كانت كل كلمة رايحة في هذا الإتجاه واحنا خلصنا تصوير يوم 29 عشان نطلع في مظاهرات 30 يونيو والمسلسل الناس كلها كانت خايفة تشتريه برا وجوا وأستاذ جمال العدل قال أنا هكلف المسلسل ده وهعمله حتى لو هعرضه على اليوتيوب”.
واستكمل “ده أكتر مسلسل بعناه في حياتنا في كل مكان، وكسر الدنيا مش هنسى إن أنا دخلت يوم 20 رمضان نادي هليوبوليس بعد ما هما مشيوا بقى أنا حسيت إن أنا عمرو دياب من كتر استقبال الناس والمسلسل كان عامل رجة مرعبة”.
وعن نهاية المسلسل قال: “النهاية كان المفروض إن هو بيتقتل دي اللي أنا كتبتها وهما موجودين في الحكم، ثم قررنا إن الناس هي تكون أصحاب القرار فعملنا نهاية إن هو بيتقتل ونهاية إن بيتقبض على اللي بيقتله وقلت بصوتي عايزين النهاية دي أو النهاية دي ده اختياركوا وانتوا اللي هتعملوا كده بإيديكوا”.
واختتم حديثه بتوجيه رسالة شكر للفنان هاني سلامة على شجاعته وعدم خوفه من تقديم الدور، قائلا: “وفيه فنانين لما عرضنا عليهم الداعية خافوا يعملوه أصلا”.
“الداعية” شارك في بطولته هاني سلامة، بسمة، ريهام عبدالغفور، أحمد فهمي، أحمد راتب.
[]https:www.youtu.cowatch?v=pNvQ59piDB4[]
[]https:www.youtu.cowatch?v=Ls6Yx8gh7RA[]
[]https:www.youtu.cowatch?v=l953hqoZvo[]